Este proxecto componse de varios obradoiros, exposicións e outras actividades, que se desenvolven anualmente en ciclos temáticos cos que se pretende animar á lectura e fomentar o uso da biblioteca facendo dela un espazo aberto e accesible á vez que se aproveita o irmandamento da vila de Camariñas coa vila francesa de La Turballe.

Destinatarios

Público infantil, xuvenil e adultos.

Equipo de organización: Biblioteca Pública Municipal do Concello de Camariñas.

Obxectivos:

Obxectivos xerais:

• Promover a lectura entre nenos e adultos, co fin de fidelizar e incrementar usuarios e o número de préstamos.
• Promover o uso de recursos, materiais e servizos da biblioteca dentro da comunidade.
• Dar a coñecer a cultura francesa, específicamente a da comunidade La Turballe.
• Mostrar a biblioteca como referente lúdico e instrutivo.

Obxectivos específicos:

• Por en valor as diferentes seccións da biblioteca (ciencias sociais, ciencias naturais, gastronomía, tecnoloxía...)
• Potenciar a creatividade e o maxín por medio da lectura.
• Cultivar a identidade local de caracter mariñeiro.

Desenvolvemento:

• Sesións de animación á lectura: tomando como punto de partida un rudimentario relato ilustrado elaborado pola Biblioteca que narra a viaxe do protagonista do proxecto á vila francesa de La turballe, organízanse varias sesións de animación á lectura con diferentes temáticas:
  • Primeira sesión: presentación do proxecto
  • Segunda sesión: medios de transporte
  • Terceira sesión: ciencias
  • Cuarta sesión: gastronomía
  • Quinta sesión: patrimonio histórico-cultural
  • Sexta sesión: diversidade lingüística
  • Sétima sesión: arte e cultura
  • Oitava sesión: literatura e música
• Exposición de La Turballe: exposición do material elaborado polos participantes nas diferentes sesións e outro material relacionado co proxecto (manualidades, libros de fotografía, agasallos da asociación francesa La Turballe cap Camariñas, folletos, camisetas, chaveiros de nós mariñeiros...)
• O pincel dos berberechos: galería de debuxos elaborados polos alumnos dos centros educactivos de ambas as dúas localidades.
• Os berberechos comen peixe: recompilación de receitas que pretende compartir técnicas culinarias e peculiaridades das dúas localidades irmandadas no tratamento do peixe, co obxectivo de editar un libro no que se recollan todas as achegas.