AVISOS
05/12/2018
Andrea Maceiras
Premio Lazarillo 2018
Premio Lazarillo 2018 de creación literaria

A galega Andrea Maceiras gaña o Premio Lazarillo 2018 de Literatura Infantil e Xuvenil na modalidade de creación literaria.

A escritora coruñesa acadou o premio coa obra Rusgalía, en palabras do xurado, unha obra ben urdida e estruturada cunha linguaxe poética con fermosas escenas que che transportan a un mundo galáctico, unha aposta pola imaxinación desbordante e a ciencia ficción.

Este galardón é o máis antigo na literatura infantil e xuvenil, convocado polo extinguido Instituto Nacional do Libro Español en 1958 coa fin de estimular a creación de bos libros para nenas e nenos e para a xuventude. Desde o ano 1986 é a OEPLI Organización Española para o Libro Infantil e Xuvenil a encargada de convocalo anualmente co patrocinio do Ministerio de Cultura e Deporte nas modalidades de creación literaria e álbum ilustrado.

O premio está dotado con 3000 euros en cada unha das súas modalidades.

As premiadas na categoría de álbum ilustrado foron Paloma Corral e Begoña Oro pola obra Un fuego rojo.

Desde Galix Asociación Galega do Libro Infantil e Xuvenil destacan que son xa 16 as escritoras e escritores galegos galardoados con este premio.