Que é?

Ler conta moito é un programa de dinamización da lectura nas bibliotecas públicas promovido pola Xunta de Galicia en colaboración coas entidades locais.

A través deste programa, as bibliotecas integradas na Rede de Bibliotecas Públicas de Galicia ofrecen actividades variadas para achegarlle á cidadanía a lectura e a información dunha maneira lúdica e atraente.

Deste xeito as bibliotecas reforzan o seu carácter de espazo aberto, ao tempo que alentan a aprendizaxe e a descuberta a través dos recursos que proporcionan.

Sala de lectura infantil

Cal é a súa finalidade?

Sala de lectura

Ler conta moito ten como obxectivo xeral animar á lectura a través dunha programación de actividades atractivas, vinculadas aos intereses dos distintos colectivos, que faciliten o achegamento aos espazos bibliotecarios.

Con este programa preténdese:

  • Fomentar o hábito da lectura no conxunto da poboación.
  • Fortalecer o papel das bibliotecas como espazo de relación, aberto e participativo, e como axente facilitador da aprendizaxe permanente e da descuberta de novos temas e inquedanzas sociais.
  • Consolidar a programación compartida da Rede de Bibliotecas Públicas de Galicia, coa renovación permanente de propostas atractivas e de calidade.
  • Promover o desenvolvemento cultural como vehículo para o crecemento persoal e colectivo.
  • Valorar o libro e, en xeral, a lectura como elemento de transmisión de coñecemento e de reflexión.

Quen o promove?

Ler conta moito é un programa promovido pola Secretaría Xeral de Cultura, da Consellería de Cultura, Educación e Universidade (Xunta de Galicia), que financia o 75% dos custos das actividades programadas. As entidades locais con bibliotecas integradas na Rede de Bibliotecas de Galicia que participan no programa cofinancian o 25% restante destes custos.

Sala de lectura

Como se desenvolve?

Catálogo de actividades

Anualmente, a Secretaría Xeral de Cultura abre unha convocatoria pública para acoller a proposta de actividades de dinamización da lectura realizadas por profesionais ou colectivos con experiencia neste ámbito que desexen participar no programa.

A partir do banco de propostas, constrúese o catálogo de actividades que resulten axeitadas para os obxectivos e requirimentos do programa.

Tanto as convocatorias e as bases para participar como o catálogo de actividades seleccionadas publícanse no portal da Rede de Bibliotecas de Galicia.

Sala de lectura infantil

Bibliotecas participantes

As bibliotecas públicas integrantes da Rede de Bibliotecas de Galicia que desexen desenvolver actividades de fomento da lectura poden acollerse a este programa, solicitando as subvencións que se convocan anualmente con esta finalidade.


Calendario de actividades

Coa programación de todas as bibliotecas participantes elabórase o calendario de actividades, que se publica na web da Rede de Bibliotecas de Galicia e no Portal de Cultura da Consellería de Cultura, Educación e Universidade.

O acceso ás actividades é aberto e gratuíto, se ben algunhas delas requiren inscrición previa, por motivos de organización.

No blog do programa Ler Conta Moito atópase un resume do realizado, da man das bibliotecas organizadoras.

Este portal emprega cookies propias necesarias para o seu correcto funcionamento e cookies de terceiros con fins analíticos, así como ligazóns a portais de terceiros para poder compartir contido nas redes sociais. Pode obter máis información aquí