Apertura do prazo de inscrición no catálogo Ler conta moito 2026 de actividades de dinamización da lectura
Hoxe, 19 de decembro de 2025, publícase no Diario Oficial de Galicia a Resolución da Dirección Xeral de Cultura pola que se abre o prazo de inscrición no catálogo Ler conta moito 2026 de actividades de dinamización da lectura en bibliotecas.
O prazo para inscribirse e solicitar a inclusión de actividades no catálogo comprende desde o 20 de decembro de 2025 ata o 26 de xaneiro de 2026.
O acceso atópase na sección “Ler conta moito” da web da Rede de Bibliotecas Públicas de Galicia, https://lercontamoito.xunta.gal/, no apartado “Alta actividades no catálogo”.
As persoas físicas e xurídicas interesadas poderán presentar un máximo de 3 propostas de actividades de dinamización. No caso de incluír 3 actividades, como mínimo unha delas terá que estar orientada especificamente a promover a igualdade entre homes e mulleres.
As actividades incluídas en anteriores edicións non se conservarán por defecto no catálogo, senón que é preciso dalas de alta de novo. Non obstante, para facilitar a inscrición, poderase recuperar a información e imaxes relativas a elas.
Para resolver as dúbidas ou incidencias que xurdan en relación con este programa, está dispoñible o correo electrónico lercontamoito [at] xunta.gal (lercontamoito[at]xunta[dot]gal) e os teléfonos 881 999 252 e 881 999 773.
As sucesivas resolucións publicaranse no apartado Axudas e subvencións desta páxina web.