Do colectivo Área3Photo
Cedemos o vestíbulo da biblioteca ao colectivo Área3Photo para a realización desta exposición fotográfica.
As fotografías que compoñen esta mostra hai que encadralas no que se coñece como foto de rúa. Trátase dunha serie de imaxes que son o froito dunha ollada sobre Berlín trinta anos despois da caída do muro.
Unha ollada fugaz e curiosa sobre esta cidade que, por atoparse tantas veces nunha encrucillada da historia, está sempre nun continuo devir, reinventándose constantemente. As fotos recollen currunchos, instantes, actitudes, xestos, miradas de xente que vive (e deixa vivir) en Berlín. Se as imaxes teñen un denominador común este non é outro que o de por de manifesto que os muros só serven para unha cousa, a saber, para ser derrubados.
Área3Photo é un colectivo de 3 fotógrafos afincados en Santiago de Compostela formado por José Manuel Pérez Pena, Carmen Torres-Maroño e Javier Ventosa Rial.
Pode visitarse no vestíbulo durante o horario de apertura da biblioteca.
